مش متقبلة شكل جوزي ولا راضية عنه

السلام عليكم ورحمة الله و بركاته انا اول مره افضفض مع حد فى مشكلتى لانى محرجه جدا اتكلم فيها مع اهلى يارب الاقى عندكم الحل المناسب انا   عندى 33  و جوزى نفس السن كان زميلى فى الجامعه مكنش فى حاجه بينا غير اننا اصدقاء و اتخطبت مرة  و فسخت بعدها اتفاجئت بيه بيكلمنى و بيقولى انه بيحبنى من زمان بس مكنش ينفع يقولى كده الا لما يطمن الاول على مستقبله ووظيفه ثابته  و كان عايز ارتباطنا يبقى رسمى وافقت مبدئيا انى اقرب منه لان كان فى ضغط كبير عليا فى البيت كنت بشوف باب بيموت كل يوم قصادى بسبب انى اتاخرت فى الجواز انا ساعتها كنت 29 سنه و اختى كانت مخطوبه و على وشك الزواج و كل مايجيلى حد حتى لو مش مناسب يتخانقوا معايا علشان اوافق عليه حسيت انى مش قادره استحمل ضغط اكتر من كده وحسيت انه طوق النجاه بالنسبالى وافقت عليه و ابتدى يكلم اهله عنى بس والده رفض لان مفيش فرق بينا فى السن و هو كان عايز يجوزه واحده اصغر منه ساعتها حسيت انى بضيع و هموت من غيره كنت اتعودت عليه و لما باباه رفضنى حسيت انى بحبه اوى و مش هقدر اعيش منغيره وهو كمان كان بيحبنى اوى و ميقدرش يعيش منغيرى عمل مشاكل كتير اوى مع اهله و سابلهم البيت و كلم قرايبه و اصحاب باباه علشان يقنعوه انه لازم يتجوزنى و اخيرا تمت الخطوبه و من بعدها ابتديت احس بحاجات غريبه زى انى اتسرعت وحسيت انى مش راضيه عن شكل جسمه هو 185 سم و وزنه 77 كجم و لاقيت شعره ابتدى يبقى خفيف قبل الخطوبه مكنتش بحس ان الحاجات دى بتزعجنى بس بعد الخطوبه بقيت احس انى مخنوقه و حاولت المحله و قالى انه هينزل جيم و هيروح لدكتور علشان شعره بس احنا فترة خطوبتنا كانت 10 شهور و مكنش فى وقت انه يعمل ده قبل الجواز و تم الجواز و مفيش اى تغيير فيه بقيت احس انى مخنوقه اوى لدرجة انه لما يرجع من الشغل و افتحله الباب احس انى دايخه و هيغمى عليا طول الليل عياط و طول النهار حسره و خصوصا لانى الحمد لله جميله و كل الناس كانت متوقع انى اتجوز واحد احسن من كده و بقيت اسمع كلام من الناس من تحت لتحت بيخنقنى اكتر لدرجة انى بقيت اتكسف اخرج معاه و اى حد يشوفنا انا كنت مأجله قرار الحمل بس هو دلوقتى قاللى انه عايز ولاد و لازم اخد قرار ومش عارفه اعمل ايه ساعات بيصعب عليا و بقول هو مش ليه ذنب و هو مجبرنيش على حاجه بس برضه مش عارفه اعمل ايه فى نفسى و مش عارفه لو سيبته هو هيعيش ازاى و انا هعمل ايه من بعده مش قادره على الطلاق ولا قادره اغمض عينى و محسش بالحاجات دى يا ريت تفيدونى و تقولولى اعمل ايه جزاكم الله خيرا